Bible Reader



Nkotulu

Mukaanda wumawu, Pawulo watina nde mu kuheke kuri mabuundu ma mu nkoonsi ya Ngalatya ma katuungiri mu ntaangu yi kayensi ku budyeengi bwa Musamu Wamubwete mu luyende lwatete (Biy 13.13-14.24). Baatu baba mu mabuundu mamo baba bvula-bvula banaangukina mu bungooyi babvuutuna na mwaa-ndaambu Bayudayo. Bobanso baba bayaari kikulu kya Lulelusunu Lwalukulu (Nga 3. 6-9; 4.21-31), lwa Mangisi ma Moose (Nga 3.10-12), na lwa babikiri (Nga 4.27).

Pawulo kamana kutuunga mabuundu mamo, nde wayende kwaandi, na ha mambisa haho bayikisi bakimi bayiingina. Bo babaandika kweleele ti Pawulo kari ntumu ya ngwanwa ko (1.1, 15-17), bakoto mu kweyikisa ti badibuundu bahele kuba Bayudayo bayelemini kubvumina Mangisi ma Bayudayo, na minkeembu mya bo, na kusalila nteendulu bubakala. Bu kaba ku Efeso, Pawulo wayuka ti badibuundu bari mu kwenama nyikusulu dzateengeme, na bakwedyaatila bunu buri nyiimunu dza muswinyi. Pawulo wabatinina mukaanda wumawu mu kusoongo ngwanwa yiri mu mbila yaandi, na yiri mu Musamu Wamubwete bunu buri Matinu. Nde wabaloombo se mu kuhele kwedyaatila bunu buri nyiimunu dza muswinyi ngo bunu buri ntwalusulu ya Mpeeve ya Nzaambi.

Mu kuyukusa baatu bunu buri Musamu Wamubwete, Pawulo wasalila Biteesu bitatu:

– Nde wuri mu kudzoonsolo dyatete mu mbila ya nde-meene, mu nyukusunu yi babakiri na bantumu baba ku Yerusalemi, na mu bumpitu-bumpyoongo bwa Petelo. Nde wuri mu kusoongo se ti, nde Mfumu wamuteele mbila na wamusoolo mu kunata Musamu Wamubwete kuri makaanda (kik. 1–2).

– Nde wuri mu kusoongo se ti mvuukulu yahele mu kusalila Mangisi na kikulu kya Bayudayo, ngo yiri mu kusiila kanyi mu Yesu Kiristo (kik. 3–4).

– Ku manunu nde wuri mu kuloombo kuri badibuundu baba kunsa ntwalusulu ya Mpeeve ya Nzaambi, bukuri Mpeeve wuhaanaa muutu manzelu mamabwete mbiki ti busiiri ntiilu (kik. 5–6).

Mpisi wadibuundu yelemini kutaambula mbila mu mutima wa mutsiina mu kuhele kuba kunsa bunkutu.