Bible Reader



Mboto

1Me Pawulo ntumu, kari bu tiiri baatu bunu pe muutu ko, ngo bu tiiriri Yesu Kiristo na taayi Nzaambi wamufulukisa mu bafwa. 2Mu kintwaari na bampaangi bobanso bari na me, turi mu kutina kuri mabuundu ma mu nkoonsi ya Ngalatya. 3Bweese na kiyeengi, bifumunaa kuri Taayi dyeetu Nzaambi, na kuri Mfumu Yesu Kiristo, biba na beenu. 4Yesu Kiristo wayekiri nyutu yaandi mu ntoono masumu ma beetu, mpisi heki katukuula mu ntaangu yayibi yimayi, bunu buri kutya kwa Nzaambi wuri Taayi dyeetu. 5Kuri nde kuba nkeembu mu mibvu ngo mibvu! Amene.

Musamu Wamubwete mosi kitsu wuri

6Me nyimono dyo dya nkimukunu, ti mu mawasu-mawasu, beenu lutekele mbisa, kuri wunde waluteele mbila mu bweese [bwa Kiristo], mu ntoono Musamu mukimi Wamubwete. 7Mukwongo, kuri Musamu mukimi ko, mbuti ka bangaa-kisaangila ko, batiiri kukitula Musamu Wamubwete wa Kiristo. 8Ngo ti hayuku beetu, bunu pe mbasi ya ku mayulu wuluyaabisiri Musamu Wamubwete wasoboko na wunde wu turi twaluyikisa, lo kabwilikila mpopi! 9Bunu bu twaleele, na mu lumalu nyibweese kuleele ti: mbuti muutu wuluyaabisa Musamu Wamubwete wasoboko na wunde wu luri lwataambula, lo kabwiilikila mpopi!

10Mukwongo, mu lumalu, me nsalila makwa mu kuyirika ma tiiri baatu hoti ma tiiri Nzaambi? Buri haho mbweeyulu kuri baatu nyisaka? Mbuti mbee nyakiri kwesaka mbweeyulu kuri baatu, lo nketyee kuba nkutu Kiristo ko.

Pawulo wakituka ntumu Yesu Kiristo

11Kuri beenu bampaangi nyiyaabisa ti: Musamu Wamubwete wu nyiri nyayaabisa kari bu tiiriri baatu ko. 12Nyahele se kutaambula nde kuri muutu; kuri muutu ti mosi se ko wanyikisa nde, ngo me nyataambula nde mu nyabusulu ya nde-meene Yesu Kiristo.

13Beenu lwayukiri bwaba ndyaatulu yaami, mu ntaangu yi nyaba mu Nzaambi Bayudayo. Me nyakwaamisa dibuundu dya Nzaambi mu kiteesu kyabvulila, na nyadibamisa. 14Mu kinzaambi kya Bayudayo, me nyaba mvuriri kiteesu na ba turi kiseendu kimosi, ba kitsuumbu kya me. Me nyaba nyakaangama kwalaka mu kikulu kya bakuutu baami.

15Ngo [Nzaambi], wansoolo kuholosono mu mwooyo nguri yaami, wanteele mbila mu bweese bwaandi, bu kamono dyo ti dyadibwete, 16mu kumonokoso Mwaana waandi kuri me, mpisi heki me nyimuyaabisa ha kakati dya makaanda; ha nsi na nsi, me nyasii loombo ndoongi kuri muutu ko. 17Me nyasii kweende se ku Yerusalemi kuri bantumu batekisiri mu kisalu na me ko, ngo me nyateleme na nyayende ku nsi ya Arabya, na nyabweese kubvutuka ku Damasiko. 18Tumi, mibvu mitatu bu myaluta, me nyatoomboko ku Yerusalemi mu kuyaabisina na Kefa, na nyadzakala kuri nde biluumbu kuumi na bitaanu. 19Me nyasii mono bantumu bakaka ko, ngo wuni Yakobo, mpaangi Mfumu. 20Ma nyiri mu kutinina beenu, nkati ha busu bwa Nzaambi, me nyahele kusa mpya.

21Tumi, ha nyeki kweendana, mu nkoonsi ya Sirya na ya Kilikya. 22Mabuundu ma Kiristo ma ku Yudaya, maba mahele kunyaaba mu kidziri. 23Ngo bo bunu bu bayukiri ti: «Wunde waba kwetukwamisaana mu ntaangu yayikulu, mu lumalu weki kweyikisa kanyi di kaba kwebamisaana haba tete.» 24Mabuundu mamo masiika Nzaambi mu ntoono me.