Bible Reader



Mandoongi ma mpotulu na mamboto

1Yimayi ngo mbala yatatu me nyeki kwiisa kuri beenu; «Mu munwa wa bambaangi boolo bunu pe batatu musamu ndemunso sa kawa.» 2Me nyaleeriri ha busu bwa beenu, mu luyisu lwadzoolo, na lumalu se nyibweese kuleele kuri nyahele ha busu bwa beenu, kuri bayirikiri masumu mu ntaangu yaluta, na kuri bobanso bakaka ti, mbuti me bweesiri kwiisa lukimi lo nyiluhemese ko, 3bukuri beenu luri mu kusaka kimbaangi ti Kiristo wudzoonsaa mu me. Nde wahele na buyonsi kuri beenu, ngo kasi wusoongaa mpinu dzaandi mu beenu. 4Mukwongo, nde bamukomini ha kuruwa mu ntoono buyonsi, ngo kasi wuri mwooyo mu mpinu dza Nzaambi. Na beetu se turi na buyonsi mu nde, ngo kasi sa twaba mwooyo mu mpinu dza Nzaambi kuri beenu. 5Fyongokinee mitima myeenu beenu-meene, mu kumono kari luri mu kanyi, tswiikiseenu mitima myeenu; hoti lwahele kubakula beenu-meene, ti Yesu Kiristo wuri mu beenu? Mbuti pele, lo beenu lwahele kuba batswiikama. 6Me nsimini ti, sa lwabakula ti beetu ngo bari, turi batswiikama. 7Ngo beetu tusaambila Nzaambi, mpisi beenu luhele kuyirika ntoono ti mosi yayibi; kari mu kuri ti beetu twaswiikama tumonokono ko, ngo mu kuri beenu luyirika mamabwe, ti hayuku beetu turi bunu twahele kuswiikama. 8Bukuri beetu turi na di tubangisina kuyirika ko, mu kunwaanisa ngwanwa, ngo kasi beetu kubangisina kusalila ngwanwa. 9Mukwongo, beetu tumonaa kiminu mpisi ntaangu yiri, beetu turi na buyonsi kasi beenu luri na makwa; mi turi mu kusambikilaa beetu miri ti beenu lubaanguka. 10Hango-nkuumbu, bu nyiri la na beenu me nyilutinina misamu mimyo, mpisi heki ha nyiba ha busu bwa beenu, me mpele kusalila kibakala, bunu buri lutumu lwa mpa Mfumu, mu kutuunga nkani ka mu kutsyaamuna ko. 11Mu misiiri ngo miri, bampaangi, monee kiminu, sakeenu kuba babaanguka, syamisinee beenu na beenu, beenee kitsimi kimosi, beenee na kiyeengi, na Nzaambi ya ntiilu na ya kiyeengi sa kaba na beenu. 12Helesenee mamboto beenu na beenu, mu nyumutunu yangisi. Bangisi bobanso baluheekiri mamboto. 13Bweese bwa Mfumu Yesu Kiristo, ntiilu ya Nzaambi, na kintwaari kya Mpeeve Yangisi biba na beenu-banso.